EUROPEAN MARATHI SAMMELAN 2027

युरोपीय मराठी संमेलन (EMS) हे मराठी भाषा, साहित्य, कला आणि सांस्कृतिक वारसा यांच्या जतन‑संवर्धनासाठी कार्यरत असलेले युरोपातील अग्रगण्य व्यासपीठ आहे. विविध क्षेत्रांतील तज्ञ, उद्योजक, कलाकार आणि रसिकांना एकत्र आणत ज्ञानविनिमय आणि सांस्कृतिक आदानप्रदानासाठी हे संमेलन आपल्या सगळ्यांना एक सुवर्णसंधी उपलब्ध करून देते.

१९९८ साली नेदरलँड्समध्ये प्रारंभ झालेल्या या उपक्रमाने गेल्या दोन दशकांत युरोपातील अनेक प्रमुख शहरांमध्ये यशस्वी वाटचाल केली आहे. २०२७ मध्ये—तब्बल २७ वर्षांनंतर—जर्मनीला पुन्हा एकदा या प्रतिष्ठित संमेलनाचे यजमानपद लाभत आहे, ही जर्मनीतील मराठी समुदायासाठी अत्यंत अभिमानाची बाब आहे.

२५ ते २७ जून २०२७ या कालावधीत हे संमेलन फ्रांकफुर्टजवळील निसर्गरम्य “बाद नाऊहाइम” येथे आयोजित करण्यात येणार आहे. या वर्षीची संकल्पना “अपूर्वरंग” ही विविध कलावैभव, साहित्यिक अभिव्यक्ती, आधुनिक विचारधारा आणि सांस्कृतिक विविधतेचे दर्शन घडवणारी ठरणार आहे.

आपली मराठमोळी परंपरा साजरी करण्यासाठी, आपली कला सादर करण्यासाठी आणि नामवंत कलाकार व तज्ञांशी संवाद साधण्यासाठी, मायमराठीशी असलेली नाळ जपणाऱ्या सर्व रसिकांना या संमेलनात सहभागी होण्याचे मनःपूर्वक आमंत्रण !

जर्मनीमध्ये आपले हार्दिक स्वागत !